Aksidan fatal Arsenal: enn zen zom mor sir le kou, enn pasazer blese

Lekatomb kontinie lor nou bann larout. Dan Petit-Gamin, Arsenal, yer, lindi le 30 aout 2021, enn grav aksidan inn fer enn mor ek enn blese, ver 15-z-er.

2x4-la inn tap anplin avek enn pie.

Read more...

Viktim-la, John Bardeaux, enn abitan Cité-La-Cure ek 35-an, inn mor sir le kou, kan veyikil dan ki li ti ete, enn 2x4, inn fer enn sorti de rout avan fini so kours kont enn pie.

Dapre nou bann informasion, zom-la ti lor kes veyikil-la moman sa dram-la ek inn violaman prozekte apre linpak-la.

Bann polisie depi stasion lapolis Terre-Rouge ek SAMU inn mande sir plas. Blese, enn parmi trwa okipan 2x4-la, enn fam 36-z-an, inn transporte lopital SSRN kot li'nn plase sou obzervasion tandik lekor viktim-la inn transporte lamorg lopital pou otopsi.

Enn lalkol test pratike lor sofer 2x4-la inn revel negatif. Lapolis Terre-Rouge inn ouver enn lanket pou determinn bann sirkonstans ekzak sa aksidan fatal-la.