Aksidan Riche-Fond: enn zen motosiklist retrouv li dan ICU

Enn zen zom 27-an inn blese grav yer, merkredi le 2 zwin 2021, lor larout rwayal Camp La Roche, Riche-Fond. Motosiklet li ti pe kondir, enn Haojue, inn perkite anplin par enn loto mark Nissan, ki enn fam abitan Vacoas ti pe kondir. Li travai kouma asistan Chief Executive Offive dan enn konsei distrik.

Loto-la inn rant an kolizion avek motosiklet-la kan li ti pe double.

Motosiklist-la, ki abit Saint-Julien Village, inn admet dan inite swin intansif lopital Dr Bruno Cheong, dan Flacq. So pronostik vital angaze.

Aksidan-la inn prodir ver 10-z-er, merkredi. Loto-la, ki ti pe sorti Riche-Fond pou al direksion FUEL, inn double enn lot veyikil ek perkit motosiklet-la, ki ti pe vini depi sans invers.

Motosiklist-la inn evakie lopital dan Flacq abor enn lanbilans SAMU. Enn tigit apre, li'nn transfere lopital lenor pou efektie enn skann, apre inn retourn lopital dan Flacq kot li'nn admet.

Kondiktris-la inn soumet a enn lalkoltes ki'nn revel negatif. Li'nn lezerman blese lor so lepous drwat ek inn gayn bann egratinier lor so likou. Tou le de veyikil inn andomaze.

Enn lekip lapolis Lallmatie, mene par kaporal Ramsurn, ti premie pou ariv sir plas. Enn lanket inn ouver pou konn bann sirkonstans ekzak aksidan-la.