Li kidnap enn tifi miner 15-z-an: enn kwizinie arete dan so plas travai

Brigad kriminel Abercombrie inn aret enn kwizinie 23-z-an dan enn lotel, dan rezion Grand-Gaube, vandredi le 20 me 2022. Se apre ki enn papa 58-an inn port plint pou Abducting Minor stasion lapolis Abercombrie, semenn dernie.

Foto ilistrasion.

Dan so depozision, papa konfie ki li'nn trouv so tifi 15-z-an, mardi le 10 me 2022. Li ti depoz li lor bistop dan zot kartie ver 7-er-10. Depi sa, li pena okenn nouvel so zen tifi. Apre plint papa-la, enn lanket ti ouver par Field Intelligence Officers ek Criminal Investigation Division (CID) Port-Louis.

Gras ar led Police Main Command & Control Centre, zen tifi inn trouve an konpayi enn zen zom lor bann zimaz Safe City. Zot ti pe sirkile lor enn motosiklet gri mark Suzuki. Bann anketer inn resi idantifie proprieter motosiklet gras ar so plak imatrikilasion.

Vandredi le 20 me 2022, avek led Divisional Crime Intelligence Unit, lapolis inn prosed arestasion enn kwizinie 23-z-an dan enn lotel dan rezion Grand Gaube. Sann-la abit rezion Petit-Raffray. Suzuki gri inn sezi pou bann bezwin lanket. Zen zom inn nie bann alegasion Abducting Minor porte kont li.

Li'nn plase dan detansion polisier, dan latant so miz an inkilpasion provizwar divan lazistis. Tandik zen fam 15-z-an, li sin ek sof kot so papa. Bann anketer kont interoz tou le de protagonist dan sa zafer-la dan bann zour pe vini.

Read more...