Seans lapriyer pou Navin Ramgoolam dan Triolet

Dharmic Parishad Association inn organiz enn laprier spesial (Yaj) par bann 'archaryas' pou retablisman Navin Ramgoolam, ki'nn gayn Covid-19, azordi apre-midi, lindi le 6 septam 2021, dan Triolet Ved Mandir, Trio Road (simin ale Jacques) 9e Mille, Triolet.

Seans lapriyer dan Triolet pou lasante Navin Ramgoolam.

Read more...

Plizir manb PTr, ladan bann ansien minist Anil Bachoo, Satish Faugoo, Suren Dayal, ek Michael Sik Yuen, eks-Private Parliamentary Secretary Dhiraj Khamajeet ek eks-depite Kalyanee Juggoo, inn asiste sa seans lapriyer-la. Parei kouma depite travayist sirkonskripsion nimero 5 (Pamplemousses/Triolet), Ranjiv Woochit, ek depite rouz sirkonskripsion nimero 6 (Grand-Baie/Poudre-d'Or), Mahen Gangapersad.

Laz 74-z-an, eks-Premie minist Navin Ramgoolam retrouv li dan Isolation Ward lopital Wellkin depi vandredi dernie. Dapre Dr Zouberr Joomaye, konseye biro Premie minist, li posib ki lider travayist transfere dan lanwit ou dimin gramatin, mardi le 7 septam 2021, ver Inde pou bann swin.

Premie minist Pravind Jugnauth finn al lopital prive Wellkin, dan Moka, azordi apre-midi, lindi le 6 septam 2021, pou get leta lasante Navin Ramgoolam avek so lekip medikal. Minist lasante, Kailesh Jagutpal, ti osi deplase.

"Navin Ramgoolan port li bien," Dr Farhad Aumeer inn asire, depi travayist ek port-parol lider PTr konsernan so leta lasante.