Sezi enn kilo eroinn: Marie Laurence Brue ek so kopin arete, bann lezot konplis sible

Enn rezo trafik ladrog ki oper dan Sainte-Croix pre pou demantele. Enn operasion mene zedi le 13 zanvie 2022 par Anti Drug and Smuggling Unit (ADSU) inn permet sezi anviron enn kilo eroinn valer Rs 15 milion ek 18 gram ladrog sintetik. Tousala pandan enn desant dan lakaz Marie Laurence Brue, 28-an.

Marie Laurence Brue ek so kopin Eldihno Lamarque inn tradir divan lazistis vandredi le 14 zanvie 2022.

Zen fam-la ek so kopin Eldihno Lamarque, 33-z-an, inn arete. Ladsou privilez tez dapre lakel koup-la zoue rol distribiter pou kont rezo-la. Tou le de sispe inn tradir divan lazistis vandredi le 14 zanvie 2022. Zot provizwarman akize pou trafik ladrog. Lanket pou bizin debous lor plizir lezot arestasion dan bann zour pe vini. Brigad antidrog pe resers plizir konplis.

Operasion-la inn fer bien boner zedi dan lakaz Marie Laurence Brue, dan Avenue Louis Baudot, Sainte-Croix. Ti enn tigit avan 5-er-30 kan bann anketer ek bann komando inn fer desant-la. Zen fam-la, ki so kazie zidisier ti vierz ziska-la, ti dan kolimater brigad antidrog depi enn bon bout letan.

Anviron enn kilo eroinn valer preske Rs 15 milion inn retrouve. Enn parti ladrog, disinile dan enn sak lamin, ti reparti dan 100 sase destine pou lavant. Enn lot parti ti kasiet sou form bann boulet dan selofann. 18 gram ladrog sintetik inn osi dekouver. Eldihno Lamarque ti prezan moman perkizision. Li osi inn transporte kartie zeneral ladsou.

Read more...