Terre-Rouge: zot vann gandia avek bann ofisie ADSU

Rezo informasion Anti Drug and Smuggling Unit (ADSU) Rose-Belle inn fonksione. Sa lekip-la, mene par inspekter Harry Appasamy, inn prosed a larestasion Warren Hans Miguel Lemince, 23-z-an ek Jean Pascal Greogry Anthony, 21-an, ki respektivman abit Le Hochet, Terre-Rouge ek Riche-Terre.

Bann sispe-la. (Sours foto: lexpress.mu)

Read more...

Zot ti lor enn parking enn sipermarse ki trouv Terre-Rouge, dan lafin apremidi lindi le 19 ziliet 2021, ek ti pe propoz pou vann gandia, pou enn som Rs 80 000, a bann polisie ki'nn fer pas pou bann aster.

Mem zour, dan aswar, dan grand-Gaube sann fwa-la, lor parking enn lotel, Vilesh Husraj, enn kwizinie 21-an ki abit Grand-Baie, ti propoz de sase gandia a bann polisie pou enn montan Rs 120 000.

Sa de operasion ladsou divizion lesid ti plase sou sipervizion asistan sirintandan lapolis, Rajendranath Jhurry. Apre ki zot inn pran rande-vou avek bann prezime diler, lekip-la finn al sipermarse Terre-Rouge.

Ti ver 16-z-er. De zenes-la inn ariv lor enn motosiklet. Bann polisie inn apros ar Warren Lemince, ki anfle kamion ek Gregory Anthony, enn metal worker, pou konklir trazaksion-la. Bann sispe-la inn kofre enn ti letan apre.

Enn sase an plastik ki kontenir 88.8 gram gandia ek enn som Rs 1 575 soupsone inn gagne apre lavant ladrog-la inn sezi. Enn telefonn portab ek motosiklet-la osi inn sezi pou bezwin lanket.

Apre, so aswar, ver 22-z-er, bann polisie finn al dan enn lotel liks dan Grand-Gaube. Zot ti ena rande-vou avek enn lot prezime diler, ki finn propoz zot pou vann gandia. Se koumsa mem ki Vilesh Husraj inn arete.

Trwa sispe-la inn pas enn premie lanwit dan selil polisie stasion lapolis Rivière-des-Anguilles. Zot inn tradir divan tribinal Pamplemousses, yer, mardi le 20 ziliet 2021. Zot reponn enn akizasion provizwar pou trafik ladrog. Zot inn rekondir dan selil polisier.